Die Ebola-uitbreking wat in Mei in die Demokratiese Republiek die Kongo (DRK) verklaar is, het na vier ander lande versprei en raak nou Sentraal-, Oos- en Wes-Afrika. Die Bundibugyo-virus is in die DRK, Kenia en Nigerië aktief aangemeld, terwyl Uganda se uitbreking beëindig is en die pasiënt wat in Frankryk behandel is, herstel het. Die verspreiding oor landsgrense het gesondheidsowerhede tot groter waaksaamheid en samewerking aangespoor.
Die Wêreldgesondheidsorganisasie (WGO) se jongste beskikbare syfers toon dat die DRK teen 18 Oktober 9 552 bevestigde gevalle en 4 602 sterftes aangeteken het. Kenia het teen 20 Oktober nege bevestigde gevalle, waaronder een sterfte, aangemeld. Nigerië het op 20 Oktober sy eerste ingevoerde geval bevestig: ’n vrou met ’n onlangse reisgeskiedenis na Uganda. Sy is in isolasie en ontvang mediese behandeling. Gesondheidsowerhede het 44 kontakte geïdentifiseer wat gemonitor word. Die WGO werk saam met plaaslike owerhede aan ondersoeke, kontakopsporing en infeksiebeheer.
Africa CDC het op 21 Oktober aangekondig dat hy op 28 Oktober ’n hoëvlak- virtuele vergadering met Afrika se gesondheidsministers sal belê om die uitbreiding van die virus te bespreek en samewerking oor grense te versterk. ’n Beroep word op lande gedoen om toesig oor moontlike gevalle, samewerking tussen buurlande en beskerming van gesondheidswerkers te verskerp.
Die Bundibugyo-virus is ’n tipe Ebola-virus. Die WGO waarsku dat lande in die streek waaksaam moet bly, gevalle vinnig moet identifiseer en moontlike kontakte moet opvolg om verdere verspreiding te beperk.
Bronne: WGO, Africa CDC
