GAUTENG. – ’n Man is Donderdagoggend (22 Oktober) dood nadat hy vermoedelik probeer het om kabels by ’n City Power-elektrisiteitsfasiliteit in Booysens Reserve te steel. Die man se liggaam is omstreeks 09:20 in ’n mediumspanning-elektrisiteitskamer naby die hoek van Mentzstraat en Booysens Reserve gevind, nadat lede van die publiek hom as bewusteloos aangemeld het. ’n Kabelsnywerktuig is by hom gevind.
Isaac Mangena, woordvoerder van City Power, sê die kamer se hoofingangsdeur is met geweld oopgemaak en die sluitmeganisme is beskadig. Voorlopige ondersoeke het ook tekens van peuterwerk aan elektriese toerusting, ’n afgesnyde neutrale geleier, beskadigde beligting en versteurde kabels getoon. City Power het die elektrisiteitstoevoer na nege verspreidingsentrums in die gebied tydelik afgeskakel terwyl die polisie die toneel ondersoek het. Die kragtoevoer is later Donderdagmiddag herstel nadat die polisie die toneel vir herstelwerk vrygestel het.
Die voorval volg op verskeie soortgelyke gevalle in Johannesburg. In September is ’n vermeende kabeldief ernstig verbrand tydens ’n poging om kabels uit ondergrondse tonnels naby die Central-substasie te steel. Hy was volgens City Power steeds in ’n kritieke toestand in die hospitaal. Op 26 Februarie is nog ’n verdagte doodgeskok tydens ’n beweerde poging om ’n mediumspanningkabel by die Manufacta-substasie in Roodepoort te sny. Op 1 Mei is ’n verdagte in ’n minikragstasie in Fleurhof gevind terwyl hy na bewering elektriese infrastruktuur probeer beskadig het. Hy is veilig verwyder en in hegtenis geneem.
City Power waarsku dat peuterwerk aan substasies, elektrisiteitskamers en ondergrondse kabelnetwerke lewensgevaarlik is. Inwoners word versoek om verdagte aktiwiteite, ongemagtigde toegang of beskadigde toegangspunte by City Power se sekuriteitsbeheerkamer aan te meld by 011 490 7900, 011 490 7911 of 011 490 7553, of via WhatsApp by 083 579 4497.
