Thomas Markle, Meghan Markle se pa, word deur die Filippynse owerhede ondersoek ná bewerings dat hy beeldmateriaal van seksuele misbruik van kinders besit het. Hy ontken die bewerings.
Nicholas Ty, ’n adjunkminister van justisie in die Filippyne, het Vrydag 23 Oktober bevestig dat ’n taakspan in Cebu die aangeleentheid ondersoek. Volgens Reuters het Markle se seun, Thomas Markle jr., materiaal, waaronder ’n skootrekenaar, aan die polisie oorhandig.
Die Filippynse minister van binnelandse sake, Jonvic Remulla, het aan Reuters gesê Markle het ’n geruime tyd in Cebu gewoon, maar daar word geglo dat hy nou terug in die Verenigde State is.
Meghan Markle se pa: hertogin ‘diep ontsteld’
Meghan, die hertogin van Sussex, het intussen in ’n verklaring gesê die nuus ontstel haar diep en dat haar gedagtes by enige kinders is wat moontlik benadeel is.
Volgens haar is ’n brief met ontstellende bewerings teen haar pa reeds in 2018 aan die Londense Metropolitaanse Polisie gestuur en later met haar gedeel. Sy sê sy is destyds verseker dat die bewerings ondersoek word.
Meghan het gesê haar besluit om afstand van haar pa te hou en hom nie kontak met haar en prins Harry se kinders, Archie en Lilibet, toe te laat nie, was daarop gemik om hulle te beskerm. Sy het die hoop uitgespreek dat geregtigheid sal geskied en kinders se veiligheid voorop sal bly.
’n Woordvoerder van die Metropolitaanse Polisie het gesê die polisie doen interne navrae oor berigte dat beamptes van sy afdeling vir koninklike en spesialisbeskerming betrokke was by die oordrag van die 2018-brief.
Lees ook: Harry en Meghan bly privaat burgers en nie-werkende koninklikes
Markle ontken aantygings
Markle het in ’n onderhoud met die Daily Mail die aantygings verwerp. Hy het gesê hy is geskok en seergemaak deur sy seun se bewerings en ontken dat hy die beweerde materiaal besit het.
Die Amerikaanse FBI het aan Entertainment Weekly bevestig dat hy van die bewerings bewus is en die Filippynse owerhede waar toepaslik sal ondersteun. Die agentskap sal ook enige verwante bewerings van oortredings van Amerikaanse federale wetgewing ondersoek. Die aantygings bly onder ondersoek.
