PRETORIA. – Ruben Bezuidenhout, ‘n matriekleerling van Afrikaans Hoër Seunskool, het ná ’n stryd teen kanker gesterf. Medelye stroom in, veral van skole regdeur die land.
Affies het hulde gebring aan Ruben en sê hy is gedurende Desember 2025 met ’n aggressiewe breingewas gediagnoseer. Ondanks sy siekte het hy volgens die skool ’n voorbeeld van deursettingsvermoë gebly. Alhoewel hy nie fisies sy matriekjaar by die skool kon voltooi nie, sê die skool hy het in die gees deel gebly van die Affies-gemeenskap en tot die einde vol moed vasgebyt.
SkoleRugby het ‘n foto geplaas van ‘n oomblik van stilte wat vir die afsterwe van Ruben gehandhaaf is.
Affies se plasing lees: “IN MEMORIAM – Dit is met leedwese wat ons verneem het van die afsterwe van Ruben Bezuidenhout in matriek. Ruben is in Desember 2025 met ‘n baie aggressiewe breingewas gediagnoseer. Ruben was ‘n passievolle atleet en het kort voor sy diagnose ook sy slag in die bokskryt begin wys. Al kon hy nie fisies in die skoolbanke sit tydens sy matriekjaar nie, het hy in gees ‘n ware Affie gebly – iemand wat met waagmoed tot die einde vasgebyt het. Affies betuig sy innige simpatie aan Ruben se ouers, familie en sy vriende.”
