AfriForum en March and March het ’n gesamentlike werkgroep gevorm om moontlike samewerking te ondersoek, wat gemeenskappe op voetsoolvlak kan bevoordeel.
Jacinta Ngobese-Zuma, stigter van March and March, het die organisasie se afvaardiging gelei tydens ’n vergadering met AfriForum se uitvoerende hoof, Kallie Kriel en ander verteenwoordigers. Die gesprekke het gefokus op gemeenskaplike uitdagings, moontlike oplossings en gebiede waar die twee organisasies kan saamwerk. Onderwerpe wat bespreek is, sluit in gemeenskapsorganisering, kapasiteitsbou, onderwys, moedertaalonderrig, gemeenskapsveiligheid, landbou-ontwikkeling en die behoud van kulturele identiteit en erfenis. Die organisasies het ook ooreengekom om moontlike regsake van wedersydse belang te ondersoek en mekaar te ondersteun met sake rakende die oppergesag van die reg en misdaadbekamping.
Ngobese-Zuma sê samewerking is nodig om ’n verenigde Suid-Afrika te bevorder wat op ubuntu, respek vir kulturele en godsdienstige oortuigings en die oppergesag van die reg gegrond is. Kriel sê AfriForum is bereid om sy ervaring met gemeenskapsorganisering met March and March te deel. Volgens hom moet organisasies saamwerk waar hulle gemeenskaplike belange het, ondanks verskille oor bepaalde sake.
Die organisasies het ook uitdagings soos swak grensbeheer, misdaad en probleme in die openbare onderwysstelsel bespreek. Hulle het beklemtoon dat oplossings binne die raamwerk van die wet en sonder geweld of intimidasie nagestreef moet word.
Druk hier om meer te lees.
