VSA. – Die Amerikaanse aktrise Hayden Panettiere, wat veral bekend was vir haar rolle in Racing Stripes, Bring It On, Ice Princess, Heroes, Nashville, die Scream-rolprentreeks en vele meer, is op 36-jarige ouderdom oorlede. Haar verteenwoordiger het haar afsterwe aan ABC News bevestig.
Haar pa, Alan “Skip” Panettiere, het volgens die Los Angeles Times ’n verklaring aan ABC News gegee waarin hy haar dood bevestig en die familie se hartseer oor haar afsterwe uitgespreek het. Hy het haar beskryf as iemand wat baie liefde en vreugde aan die mense om haar en aan miljoene aanhangers gebring het.
Associated Press berig ook dat Panettiere oorlede is, terwyl die oorsaak van haar dood steeds nie bekend gemaak is nie. Volgens die berig het sy haar loopbaan as kinderaktrise begin voordat sy internasionale bekendheid verwerf het.
Haar familie het versoek dat hul privaatheid gedurende die routyd gerespekteer word. Haar memoir, This Is Me: A Reckoning, is deur Grand Central Publishing in Mei vanjaar uitgegee. In die boek vertel Panettiere openlik oor haar lewe en loopbaan, insluitend haar jare as kinderster, die druk van Hollywood, verslawing, depressie ná die geboorte van haar dogter, haar verhoudings en die dood van haar broer, Jansen.
Haar jonger broer, Jansen Panettiere, is in Februarie 2023 op 28-jarige ouderdom oorlede. Die familie het ’n week later, op grond van die mediese ondersoek, bevestig dat Jansen se dood veroorsaak is deur ’n vergrote hart, saam met komplikasies aan die aortaklep. Jansen was self ’n akteur en kunstenaar. Hy het onder meer in The Walking Dead, Everybody Hates Chris, Even Stevens en The Last Day of Summer verskyn, en het ook stemrolle vertolk in onder meer Ice Age: The Meltdown.
Bronne: ABC News, Associated Press, Los Angeles Times, Variety, Holywood Reporter en Grand Central Publishing
