KATAR. – Alle vlugte by Hamad Internasionale Lughawe in Doha is tydelik opgeskort nadat Katar se lugruim gesluit is te midde van toenemende spanning in die Midde-Ooste.
Voglens die Manchester Evening News het die lughawe in ’n dringende kennisgewing bevestig dat alle vlugte gestaak is nadat die Katarrese owerhede besluit het om die land se lugruim voorlopig te sluit.
Die stap volg op die konflik wat verder in die streek eskaleer, wat toenemende kommer oor veiligheid en lugverkeer veroorsaak. Lughawe-owerhede het gesê die situasie word deurlopend gemonitor, en dat verdere opdaterings gegee sal word sodra daar meer duidelikheid is oor wanneer vlugbedrywighede kan hervat.
Passasiers is aangeraai om by hul lugrederye navraag te doen oor die status van hul vlugte en om die lughawe se amptelike kommunikasiekanale dop te hou vir nuwe inligting.
Die opskorting van vlugte kan beduidende ontwrigting vir internasionale reisigers veroorsaak, aangesien Hamad Internasionale Lughawe een van die besigste lughawens in die Midde-Ooste is.
Bron: Hamad International Airport, Manchester Evening News
