GAUTENG. – Kasper Stander (69) en Rian Stander (46) het Donderdag op beskuldigings van diefstal, bedrog, geldwassery en besit van gesteelde voertuigonderdele in die Benoni-streekhof verskyn. Albei is op borg van R2 000 vrygelaat en die saak is tot 9 Maart uitgestel.
Kol. Katlego Mogale, Valke-woordvoerder, sê die Standers is op 3 Maart tydens Project Vivian, ’n intelligensie-gedrewe operasie deur die Gauteng-Valke en die NVG in hegtenis geneem. Hulle is verbind aan ’n soektog by ’n stoorfasiliteit in Benoni waar ’n grys Toyota Hilux-dubbelkajuitbakkie gevind is, met vermoedelik gesteelde onderdele en ’n gemanipuleerde enjin- en VIN-nommer.
In ‘n uitgebreide soektog by die fasiliteit met 100 eenhede is twee eenhede geïdentifiseer. Die soektog het ’n Hyundai H100-enjin wat bevestig is dat dit geroof is en vier Toyota Fortuner-remversterkers opgelewer. Al die voertuie en onderdele is vir verdere ondersoek in beslag geneem. Die verdagtes is aan nege ander sake verbind wat vroeër teruggetrek is.
Die ondersoek duur voort en verdere arrestasies word nie uitgesluit nie.
