Jason Vanporppal (26) van Paramount, Kalifornië, het vandag op Afrikadag sy merkwaardige reis met ‘n skaatsplank dwarsoor Afrika voltooi. Die reis het by die City Bowl-skaatsbaan in Kaapstad tot ‘n einde gekom.
Vanporppal het op 8 Februarie 2026 in Kampala, Uganda, vertrek en meer as 6 400 kilometer oor sewe Afrika-lande afgelê – deur Rwanda, Tanzanië, Zambië, Zimbabwe, Botswana en Suid-Afrika – om geld in te samel vir die bou van Uganda se eerste permanente skaatsbaan. Hy is vergesel deur twee Ugandese skaatplankryers: Isaac Jojinah en Ephraim Ssekiziyiv. In Suid-Afrika het hy deur Johannesburg, Kroonstad, Bloemfontein, Beaufort-Wes, Richmond en Laingsburg geskaats. Ná 106 dae op die pad het Suid-Afrikaners hom oral ondersteun en boonop van kos en beddens voorsien. Erewagte en begeleiding het deel van die Amerikaner se pad deur Suid-Afrika uitgemaak.
Dit is nie Vanporppal se eerste rekordpoging nie – hy het reeds van Venice Beach na Times Square in New York in 76 dae geskaats, asook van Hokkaido na Okinawa in Japan in 50 dae.
Met sy aankoms in Kaapstad het Vanporppal ongeveer R590 000 deur GoFundMe ingesamel.
Bronne: GoFundMe, IOLCape Towner, Good Things Guy, BrieflyCape Towner
