AUSTRALIë. – Die familie van ’n Britse meisie, Cheryl Grimmer, wat meer as 55 jaar gelede in Australië verdwyn het, het ’n besluit deur aanklaers verwelkom om haar saak moontlik te heropen.
Volgens die BBC het die direkteur van openbare vervolging in Nieu-Suid-Wallis, Sally Dowling, ná openbare druk, insluitend van die meisie se familie, gesê haar kantoor is bereid tot ’n spesiale hersiening van die besluit om ‘n klag teen ‘n verdagte terug te trek.
Dowling het in ’n brief aan die Grimmer-familie gesê die normale tydperk waarbinne families ’n hersiening kan aanvra, het reeds verstryk, maar dat sy tog ingestem het om na die saak te kyk. Sy het gesê sy kan die saak nou hersien op grond van bewyse wat die polisie in 2019 oorhandig het, of die familie kan wag totdat speurders die “nuwe” inligting wat hulle glo gevind het, oorweeg het.
Cheryl Gene Grimmer (30 Oktober 1966 – vermis sedert 12 Januarie 1970; in 2011 wetlik dood verklaar) was ’n driejarige Britse kleuter wat in Januarie 1970 van Fairy Meadow-strand in Wollongong, Nieu-Suid-Wallis, ontvoer is. Sy was in die stortgeriewe by die strand toe ooggetuies beweer ’n man het haar gegryp en met haar weggehardloop.
Cheryl se verdwyning het meer as 45 jaar lank sonder verduideliking gebly totdat ’n verdagte in Maart 2017 in hegtenis geneem en aangekla is. Die verdagte het beweer dat hy, toe 16 jaar oud, Cheryl sowat ’n uur ná haar ontvoering in die nabygeleë woonbuurt Balgownie verwurg het.
By ’n hofverskyning het die man onskuldig gepleit. Sy verhoor sou na verwagting in Mei 2019 in die hooggeregshof van Nieu-Suid-Wallis plaasvind, maar ’n regter het beslis dat ’n sleutelbewysstuk ontoelaatbaar is, waarna die aanklaers die klagte teruggetrek het.
Bronne: BBC, Illawarra Mercury
