GAUTENG. – ’n Video van ’n bakleiery tydens ’n skolerugbywedstryd tussen Hoërskool Menlopark en Hoërskool Dr. E.G. Jansen op Saterdag het op sosiale media versprei. Die opname is deur Wendy Pascoe gedeel. Druk hier om die video-opname te sien.
Volgens inligting wat deur Menlo Rugby bekend gemaak is, het Menlopark se rugbyspanne op hul tuisveld teen E.G. Jansen se spanne uitgedraf. Menlopark het nege van die 13 wedstryde gewen. Hoewel Menlo Rugby die wedstryddag as “harde rugby” beskryf het, is daar geen melding van die bakleiery in die inligting wat deur die skole op hul sosiale media gedeel is nie.
Nuusflits het intussen albei skole om kommentaar oor die voorval genader. Enige terugvoer wat ontvang word, sal by die berig gevoeg word.
