VRYSTAAT. – ’n Bejaarde egpaar, onderskeidelik 77 en 80 jaar oud, is die naweek op hul plaas buite Bothaville aangeval en beroof in ’n gewelddadige voorval wat tans deur die polisie ondersoek word.
Volgens polisiewoordvoerder, sers. Palesa Thabana, het die voorval Sondagaand omstreeks 20:00 plaasgevind toe die 77-jarige man en sy 80-jarige vrou pas by hul woning aangekom het en deur drie onbekende mans oorval is. Na bewering het die verdagtes, wat handskoene gedra en hul gesigte bedek het, die man met ’n hamer teen die kop geslaan terwyl die vrou deur twee van die aanvallers vasgekeer is.
Die egpaar is daarna die huis in geneem waar hulle met ’n staalstaaf aangerand is en gedwing is om geld te oorhandig. Een van die aanvallers was na bewering met ’n vuurwapen gewapen. Die slagoffers is verder op die bed laat sit, met kleefband gemuilband en hul hande vasgebind, waarna die verdagtes die slaapkamer deursoek het. ’n Rewolwer, vroueklere en skoene, asook ’n onbekende bedrag geld is gebuit voordat die aanvallers van die toneel gevlug het. Die egpaar kon hulself eers later die aand losmaak en het omstreeks 23:30 die polisie ontbied. Albei het ligte beserings opgedoen.
’n Saak van huisroof is geregistreer en ’n soektog na die verdagtes is tans aan die gang. Die polisie doen ’n beroep op enigiemand met inligting wat kan help met die ondersoek of die inhegtenisneming van die verdagtes om na vore te kom. Kapt. Maleme kan by 082 466 7923 gebel word.
