GAUTENG. – Die Life Eugene Marais-hospitaal in Pretoria het die harte van diereliefhebbers geraak met ‘n Facebook-plasing oor Sparkles, ‘n bejaarde hond wat tans bestraling vir kanker kry.
Die hospitaal sê Vrydag in die plasing Sparkles word vir selkarsinoom, ‘n vorm van velkanker, in die onkologie-eenheid behandel. Hoewel die hond ook ‘n harttoestand het, vorder die behandeling goed danksy die sorg van ‘n multidissiplinêre span spesialiste. Volgens die plasing staan Sparkles se gemak, waardigheid en lewensgehalte sentraal tot elke besluit wat oor haar behandeling geneem word. Die hospitaal beskryf haar as ‘n toonbeeld van deursettingsvermoë en sê sy bewys elke dag dat veerkragtigheid soms op vier pote kom.
Life Eugene Marais sê dit is ‘n voorreg om deel van Sparkles se behandeling te wees en beklemtoon dat elke pasiënt wat aan hul sorg toevertrou word, of dit nou ‘n mens of ‘n dier is, met dieselfde deernis en toewyding behandel word.
