NOORD-KAAP. – Andrew Benjamin, ook bekend as “Benjie Baby” van Kimberley, is as die nuwe wenner van MasterChef South Africa gekroon en het terselfdertyd geskiedenis gemaak as die eerste kampioen uit die Noord-Kaap.
Volgens MasterChef South Africa is Benjie ’n 40-jarige tuiskok wat aan hoëspanning-elektrisiteitslyne regoor die land werk. Benjie het voorheen aan Kokkedoor: Vuur & Vlam deelgeneem, waar hy en sy span tweede geëindig het. Hy is veral bekend vir sy liefde vir kos wat oor ’n oop vuur berei word, met Suid-Afrikaanse geure wat volgens hom deur sy ouma se kombuis geïnspireer is. Hy het nou van tuiskok tot MasterChef South Africa-kampioen gevorder en is die eerste trotse deelnemer uit die Noord-Kaap wat die titel verower.
MasterChef South Africa het Benjie gelukgewens met sy geskiedkundige oorwinning.
