VK. – Julia Wandelt (24), die vrou wat glo Maddie McCann se familie bekruip het, het gister getuig sy is nog “50-50” oor of sy Maddie is.
Lees ook: McCann-familie se beweerde bekruiper ‘bevraagteken steeds wie sy is’
Aanklaer Michael Duck KC het Wandelt onder kruisverhoor gevra of sy steeds glo sy is Madeleine. Sy het gesê: “Dis nie ja of nee nie. Want dit sal maklik wees om my te voorsien van die dokumentasie, so as ek nie sy is nie en dit is rêrig negatief, wil ek die dokumentasie sien. Ek sal nou sê ek is 50-50. Wat is die probleem om al die dokumentasie te oorhandig?”.
Duck KC het weer gevra of sy glo sy is Madeleine en sy het geantwoord: ”Dis nie ja of nee nie. Dit is nie ja nie en dit is nie nee nie. Ek is tussenin”.
Hy het gevra wat haar tevrede sal stel en sy het geantwoord: “’n Ondersoek oor my verdwyning, wat met my gebeur het, hoekom is ek hier?”
Duck KC het gevra of sy sal wegloop as sy ‘n negatiewe DNS-toetsuitslag sien. Sy het geantwoord: “As ek die volledige papierwerk kry ja, ek sal wegloop”.
DNS-toetse is geneem toe Wandelt in hegtenis geneem is, wat bewys het sy is nie Madeleine nie. Wandelt het gesê sy het die uitslae op 1 April ontvang en dat sy gevoel het dit was “disrespekvol” omdat dit op Gekkedag gekom het.
Duck KC het Wandelt gevra oor die “verskeie kere” wat haar oproepe aan die McCann-familie geïgnoreer is en sy het gesê sy dink nie dit was onwelkome kontak nie, maar dat sy gedink het “Kate is om een of ander rede gedreig om nie met my te praat nie”.
Wandelt en Karen Spragg het aanklagtes dat hulle die McCann-gesin tussen Junie 2022 en Februarie 2025 bekruip het, ontken.
Bronne: BBC, Metro, The Independent
Lees ook: McCann-familie se beweerde bekruiper ‘bevraagteken steeds wie sy is’
