KWAZULU-NATAL. – ‘n Geregtelike doodsondersoek is geopen nadat ‘n buitelandse man Maandagaand dood is toe hy vermoedelik van die agtste verdieping van ‘n gebou in Margaret Mncadi-laan in Durban gespring het.
Kol. Robert Netshiunda, polisiewoordvoerder, sê die voorval word deur die Durban-Sentraal-polisie ondersoek. Volgens die polisie het drie buitelandse burgers glo toegang tot ‘n stoorfasiliteit verkry en vir ongeveer drie dae daar geskuil. Die drie het na bewering Maandagaand geluide gehoor en vermoed dat iemand op hulle toegesak het. Een van die mans het toe uit die gebou gespring en is op die toneel dood verklaar nadat hy noodlottige beserings opgedoen het. Een van die ander twee mans het gevlug, terwyl die derde op die toneel agtergebly het.
Die polisie ondersoek steeds die omstandighede van die voorval en is ook besig om die oorledene en die ander man se verblyfstatus in Suid-Afrika te verifieer.
