KWAZULU-NATAL. – ‘n Driejarige seuntjie is in ‘n ernstige toestand na ‘n hospitaal vervoer nadat hy na bewering vir sowat tien minute onder die water in ‘n swembad by Salt Rock was. Jacques Joubert, ‘n buurman, het KPR toegepas.
Kelsey-Jae Meyrick, woordvoerder van IPSS Medical Rescue, sê nooddienste is na die toneel ontbied waar hulle die kind in ‘n kritieke toestand aangetref het. Voordat paramedici opgedaag het, het Joubert die seuntjie uit die swembad gehaal en onmiddellik met kardiopulmonêre resussitasie (KPR) begin. Die kind is daarna op die toneel gestabiliseer en deur ‘n gevorderde lewensondersteuningsparamedikus na ‘n nabygeleë hospitaal vervoer.
Volgens Meyrick het Joubert se vinnige optrede en die onmiddellike toediening van KPR waarskynlik die seuntjie se lewe gered en ‘n groter tragedie voorkom.
