NOORDWES. – Ian Cameron het skerp gereageer op ’n sosialemediaplasing wat aan Andile Mngxitama, MK-party-LP, toegeskryf word waarin die afsny van die ore van die plaasaanvalslagoffer Donovan Marx as ’n politieke simboliese daad beskryf word.
Ian Cameron, DA-LP woordvoerder oor die polisie en die voorsitter van die parlementêre portefeuljekomitee oor polisie, beskryf die uitlatings as ’n weersinwekkende poging om marteling politieke regverdiging te gee. Hy sê geen argument oor grond kan die verminking van ’n mens regverdig nie en dat dit lafhartig is om die lyding van ’n ernstig beseerde man vir rasse-uitlokking te gebruik.
Cameron sê hy het Mngxitama se rassistiese denke al verskeie kere in die Parlement teëgestaan. Hy verwys onder meer na ’n debat op 6 Junie 2025 waarin hy ná Mngxitama gepraat en daarop aangedring het dat plaasaanvalle voorkeur moet geniet. Willie Aucamp, die huidige minister van landbou, het volgens Cameron ook Mngxitama se pogings om plaasgeweld te regverdig, teengestaan.
Hy verwys verder na die gesamentlike verslag van die parlementêre portefeuljekomitees oor polisie en landbou wat op 15 Julie 2025 met 186 stemme teenoor 75 aanvaar is. Volgens Cameron het die DA die verslag gesteun, terwyl die MK-party, EFF, VF Plus en United Africans Transformation daarteen gestem het.
Cameron doen ’n beroep op die MK-party om vas te stel of Mngxitama die betrokke uitlatings gemaak het, die boodskap daarvan te verwerp en aan te dui watter dissiplinêre stappe gevolg sal word indien sy outeurskap bevestig word.
Indien Mngxitama wel die plasing gemaak het, behoort hy volgens Cameron ’n regstelling en verskoning aan Donovan en sy familie te bied.
Cameron sê die DA sal die saak ook na die Parlement se gesamentlike etiek- en lede-belange-komitee verwys sodat die feite vasgestel en die uitlatings aan LP’s se etiese verpligtinge getoets kan word.
Hy voeg by dat die DA sal voortgaan om hom vir doeltreffende beskerming van boere en plaaswerkers te beywer. Donovan en sy familie verdien volgens hom waardigheid en privaatheid terwyl hy herstel en ondersoekers hul werk voortsit.
Ongeveer 22 uur gelede is die volgende plasing op ‘n Facebook-blad met die naam “Andile Mngxitama” gemaak: “House negroes and their land thieving masters are crying there by twitter. Tagging Elon Musk and Trump! Just for this status update. “Ventersdorp white farmer Donovan Marx had his ears cut off during a Plaas moord aanval. Attacking the ears is symbolic to denote the refusal of land thieves to listen. No land no peace. Farm life is overdetermined by systematic violence! Blacks got killed and fed to pigs!” Mxim”
