Saterdag 22 Augustus was D-dag vir die halfeindwedstryde in die Sanlam Carlton Cup. Die Carlton Cup is die Blou Bul-rugbyunie (BBRU) se vertoonvenster vir hul klubrugbytalent. TUKS het hul staal gewys en Centurion in ‘n pragwedstryd gewen.
Geskiedenis van die BBRU Carlton Cup
Ongeveer 120 jaar gelede het daar ’n onbekende trofee op die rak van ’n plaaslike kroeg in Pretoria gestaan. Die spelers het die kroegeienaar gevra of hulle daarvoor kon meeding. Hy het ingestem en in 1904 is die trofee na die kroeg, Carlton, vernoem. In 1938 breek die Noord-Transvaalse rugbyunie weg van die Transvaal-rugbyunie en word die Carlton Cup gebore.
TUKS kry oorhand oor Centurion
Centurion, wat laasjaar in die finaal gespeel het, het gehoop om weer hierdie jaar so te maak. Hulle het immers tuisveldvoordeel gehad. TUKS het laasjaar in die halffinaal teen Grizzlies vasgeval en sou alles in die stryd werp om hierdie jaar die finaal te haal.
Saterdag se wedstryd in Centurion was sonder twyfel ’n vertoonvenster van die talent in die BBRU. ’n Brutale voorrystryd en ’n see van drieë het vir ’n aanskoulike wedstryd gesorg. TUKS het teen rustyd reeds vyf drieë gedruk en het 35-14 voorgeloop. Ná rustyd het Centurion goed teruggeveg, maar moes ongelukkig die knie teen hulle teenstanders buig. ‘n Finale telling van 46-35 in die guns van TUKS was op die finale telkaart.
Fokus op die finaal
TUKS speel vir die eerste keer sedert 2018 in die Carlton Cup-finaal. Alhoewel hulle al 25 keer die beker omhoog gehou het, het hulle dit laas in 2015 vermag. Hierdie studentespan sal graag weer die TUKS-gloriedae wil terugbring. Hulle kom in die finaal op 5 September te staan teen NAKA Bulle.
In die ander halffinaal het die verdedigende kampioen, NAKA Bulle, die span van Harlequins ’n behoorlike loesing gegee. Die eindtelling was 75-35 in NAKA se guns. NAKA Bulle, wat die beker al die laaste drie jaar huisves, gaan moeilik gestuit word.
