Die DA het in ’n poging om die voormalige president Jacob Zuma te verhoed om sy appèl voort te sit hofstukke by die konstitusionele hof ingedien. Die appèl is teen die bevel dat hy byna R29 miljoen vir sy persoonlike regskostes aan die staat moet terugbetaal.
Ashor Sarupen, voorsitter van die DA se federale raad, sê die party voer aan dat Zuma se aansoek om verlof tot appèl geen redelike vooruitsigte op sukses het nie en nie ’n werklike grondwetlike vraag opper nie. Volgens hom probeer Zuma om ’n saak te heropen wat reeds deur die howe beslis is.
Die saak spruit uit ’n 2018-uitspraak van die hooggeregshof wat bevind het dat Zuma aanspreeklik is vir regskoste wat die staat namens hom betaal het tydens sy strafregtelike vervolging en verwante litigasie. Die beslissing is in 2021 deur die hoogste hof van appèl bekragtig. ‘n Totale bedrag van R28,960,774.34 is deur die staatsprokureur bereken wat Zuma moet terugbetaal.
Die DA sê die beginsel is eenvoudig dat openbare geld vir die publiek bedoel is en nie gebruik moet word om die private regstryd van politici te finansier nie. Die party vra dat die konstitusionele hof Zuma se aansoek met koste van die hand wys. Sarupen beklemtoon dat niemand, insluitend voormalige presidente, bo die reg verhewe is nie.
