WES-KAAP. – Altesaam 206 aanvalle op personeel van noodmediesedienste en noodvoertuie is oor die afgelope drie boekjare, van 2023/24 tot 2025/26, in die Wes-Kaap aangeteken. Die DA vra nou vir strenger optrede deur die polisie en die nasionale vervolgingsgesag om dié aanvalle hok te slaan.
Memory Booysen, die DA se Wes-Kaapse woordvoerder oor gesondheid en welstand, sê die meeste aanvalle is in die Metro-Noord-afdeling (32), Metro-Wes (21), Metro-Oos (19), Metro-Suid (17) en die Paarl (12) aangemeld. Volgens haar raak elke aanval op ambulanspersoneel nie net die slagoffers nie, maar dit stel ook pasiënte se lewens in gevaar weens vertragings in noodreaksie en mediese behandeling.
Die departement van gesondheid en welstand het self verskeie veiligheidsmaatreëls ingestel, waaronder risiko-gebaseerde ontplooiing, veiligheidsbegeleiding in hoërisikogebiede, voertuigopsporing, veiligheidsopleiding vir personeel en samewerking met gemeenskapspolisiëringsforums, buurtwagte, die polisie en plaaslike owerhede.
Booysen sê paramedici en ander nooddienswerkers stel daagliks hul eie veiligheid op die spel om lewens te red en moet beter beskerm word. Die DA doen ‘n beroep op die polisie om ondersoeke en inhegtenisnemings in sulke sake te prioritiseer, terwyl die NVG versoek word om vervolgings daadwerklik deur te voer sodat oortreders aanspreeklik gehou kan word.
