WES-KAAP. – Die DA gaan Maandag die stryd om private eiendom in die Wes-Kaapse Hooggeregshof voer, waar die party die grondwetlikheid van die nuwe Onteieningswet gaan betwis. Dit raak elke gesin se huis, ondernemings se eiendom, werkers se pensioenbelange en Suid-Afrikaners se geleentheid om in die toekoms eiendom te besit.
Geordin Hill-Lewis, DA-leier, sê die party sal die hof vra om die wet ongeldig en ongrondwetlik te verklaar. Volgens die DA gee die wet die staat te wye magte om eiendom te onteien en is daar bepalings wat vaag en teenstrydig is met die Grondwet se beskerming van eiendomsreg. Die party voer ook aan dat die wet deur ’n gebrekkige parlementêre proses aanvaar is.
Volgens Hill-Lewis gaan die saak egter oor meer as net die wetgewing. Die DA sê hy sal onteiening sonder vergoeding teenstaan, ongeag of dit as “nul vergoeding”, voogdyskap of ’n ander term beskryf word. Die party meen wettige onteiening vir ’n geldige openbare doel moet steeds aan behoorlike regsprosesse, onafhanklike geregtelike toesig en billike vergoeding onderhewig wees.
Hill-Lewis sê die oplossing vir Suid-Afrika se geskiedenis van beperkte toegang tot eiendom is nie om eiendomsreg verder te verswak nie, maar om veilige en volhoubare eiendomsbesit aan meer Suid-Afrikaners te bied. Volgens die DA kan onsekerheid oor eiendomsreg belegging ontmoedig, dit vir ondernemings en boere moeiliker maak om krediet te bekom en vertroue in die ekonomie verswak. Die party sê hy sal die beginsel van private eiendomsbesit in die hof, die parlement en die regering verdedig.
Die DA stel homself ten doel as ’n party wat volgens Hill-Lewis ’n ekonomie wil bou waarin meer Suid-Afrikaners eiendom besit, belê, ondernemings bou en werk skep.
