Die voormalige All Blacks-loskakel, Dan Carter, het ná die All Blacks se reeks nederlae teen die Springbokke hulde gebring aan die rugbywedywering tussen die twee spanne.
Carter sê hy het al genoeg keer teen die Springbokke gespeel om te weet waarom die kragmeting as rugby se “Greatest Rivalry” beskryf word. Hy het ook erken dat die reeksverlies seergemaak het en dat hy graag wou sien dat die All Blacks elke toets wen. Volgens Carter lê die intensiteit van die wedywering juis daarin dat geeneen van die twee spanne die ander ooit toelaat om gemaklik te raak nie.
Hy het egter ook die onderlinge respek tussen die spelers beklemtoon en gesê sommige van die mense naaste aan hom in rugby is spelers wat hy voorheen op die veld wou klop.
Carter, wat die toer dié keer van die pawiljoen af gevolg het, sê hy waardeer nou selfs meer hoe ’n toer spelers, families en ondersteuners bymekaarbring. “Wat ’n toer,” het Carter afgesluit.
