WES-KAAP. – Die Cape of Good Hope DBV het inspekteurs na verskeie punte regoor Kaapstad uitgestuur, waar hulle saam met die Stad Kaapstad en ander agentskappe werk om te verseker dat geen dier agtergelaat word deur mense wat die land verlaat nie.
Dit kom te midde van groeiende spanning rondom immigrasie en met ‘n nasionale protesaksie wat aktivistegroepe vir 30 Junie beplan. Talle mense verlaat tans hulle huise onder wydverspreide vrees en onsekerheid. Die DBV se inspekteurs gesels met mense by versamelpunte om vas te stel of enigeen die land verlaat sonder dat hulle tyd gehad het om reëlings vir hul diere te tref. Waar dit die geval is, sal die organisasie reël dat die dier namens hulle in die DBV se sorg opgeneem word. Volgens die DBV word diere maklik die stille slagoffers in tye van vrees en onsekerheid – dit is presies waarom hulle daar is om te help.
Enigiemand wat van ‘n dier weet wat agtergelaat is omdat die eienaar haastig uit die land vertrek het, word gevra om die Cape of Good Hope-DBV te bel. Die diens is 24 uur per dag, sewe dae per week beskikbaar by 021 700 4158 of 021 700 4159, of via WhatsApp by 021 700 4140.
