Derick Hougaard, die voormalige Springbok-rugbyspeler, het hom tot sosiale media gewend met ‘n emosionele boodskap waarin hy sê hy verkeer in groot moeilikheid en hoop dat ‘n nuwe geleentheid oor sy pad sal kom.
Hougaard, wat Suid-Afrika tussen 2003 en 2007 as losskakel verteenwoordig het en ook vir onder meer die Bulls, Leicester Tigers en Saracens uitgedraf het, het gesê hy bid vir God se guns en dat hy glo enigiets is moontlik as mense saamstaan. Nadat sy plasing aandag getrek het, het Hougaard verduidelik dat dit wel hy is wat die boodskap gedeel het. Hy het gesê hy was lank laas op Facebook omdat hy privaatheid gesoek het en dat hy bloot op soek is na “‘n nuwe begin en uitdaging.” In ‘n latere kommentaar het Hougaard gesê hy is skaam om sy huidige omstandighede bekend te maak, maar dat dit ‘n werklikheid is waarmee hy moet saamleef. Hy het bygevoeg dat hy hoop “‘n engel” sal oor sy pad kom.
Hougaard het nie bekend gemaak waarna hy spesifiek verwys of watter hulp hy benodig nie. Sy plasing het egter talle boodskappe van ondersteuning van sosialemediagebruikers ontlok.
