NOORD-KAAP. – Laerskool Kathu het Saterdag hul onderwyser-afrigters geloof vir hul onbaatsugtige optrede tydens ’n sportdag wat deur swaar reën ontwrig is.
Volgens ’n plasing op die skool se amptelike sosiale media het Laerskool Oranje-Noord se sportdag tot ’n einde gekom toe die weer versleg het. Onderwysers van Kathu het egter sonder huiwering ingespring om kinders veilig deur die modder en water na hul busse te begelei, ten spyte daarvan dat hulle self deurnat geraak het.
Die skool sê slegs drie van die onderwysers is op kamera vasgevang, maar dat baie meer gehelp het. Personeel is geloof vir hul diensbare harte en die voorbeeld wat hulle aan leerlinge stel.
Die plasing het groot lof uit die gemeenskap ontlok, met talle mense wat die onderwysers as van die beste beskryf het. Kommentators het ook hul vertroue uitgespreek dat kinders in veilige en sorgsame hande is.
“Kyk net hierdie Laerskool Kathu-onderwyser-afrigters se diensbare harte. Toe die reën Laerskool Oranje-Noord se sportdag kortknip, het hulle op en af in die reën geloop om kinders deur die modder en water by die busse te kry, self sopnat. En hierdie is maar net drie wat op kamera vasgevang is. Dankie dat julle lei deur diensbaar te wees, en diensbaarheid in aksie vir ons kinders modelleer.”
