Die Suid-Afrikaanse Bankrisiko-inligtingsentrum (Sabric) het in sy 2025- jaarlikse bankmisdaadstatistiekverslag bevind verliese weens digitale bankmisdaad het in 2025 tot R2,4 miljard gestyg, teenoor sowat R1,9 miljard in 2024.
Sabric sê die verslag toon dat finansiële misdadigers hul metodes toenemend verfyn, veral binne ‘n digitale bankomgewing. Bedrog waar die fisieke kaart nie by die transaksie teenwoordig is nie, bly volgens Sabric een van die belangrikste vorme van bedrog wat verbruikers raak. Misdaad wat met banktoepassings verband hou, was verantwoordelik vir meer as 70% van die aangemelde verliese weens digitale bankmisdaad. Verliese weens kaartbedrog het ook met 18% toegeneem tot R1,7 miljard.
Daar was egter ook positiewe tendense. Bedrieglike aansoeke om huis- en verbandlenings het met 3,4% afgeneem, van R599,7 miljoen in 2024 tot R595,9 miljoen in 2025. Aanvalle op kitsbanke het met 46% afgeneem, terwyl die gepaardgaande kontantverliese met 63% gedaal het. Sabric skryf die afname onder meer toe aan voortgesette voorkomingsmaatreëls deur die bedryf. Bankrooftogte het ook verder afgeneem. Slegs twee voorvalle is in 2025 aangemeld, vergeleke met agt die vorige jaar.
Die organisasie waarsku dat misdadigers steeds hul tegnieke aanpas, onder meer deur kunsmatige intelligensie-gedrewe bedrog, kubermisdaad, digitale bankswendelary en kaartbedrog. Sabric moedig Suid-Afrikaners aan om hulself oor nuwe bedrogtegnieke in te lig en die beskikbare veiligheidsriglyne te volg.
Sabric sê die verslag bied belangrike inligting oor misdaadneigings en die toenemende metodes wat teen individue, ondernemings en finansiële instellings gebruik word.
Druk hier om meer te lees.
