Weerkaarte in berig.
Suid-Afrika betree vandag amptelik die meteorologiese winter, wat vanaf 1 Junie tot einde Augustus strek. Die eerste winterdag word as betreklik rustig voorspel met die seisoen se eerste beduidende afsnit-laedrukstelsel wat nader beweeg. Hierdie stelsel sal koue, nat en winderige toestande oor dele van die land meebring.
Mistige toestande word langs die weskus en oor die noordooste verwag. Vir Woensdag en Donderdag (3–4 Junie) is ‘n Oranje Vlak 5-waarskuwing uitgereik vir die oostelike Tuinroete-distrik in die Wes-Kaap, asook langs die kus en binneland tussen Plettenbergbaai en Oos-Londen. Lewensgevaarlike oorstromings van paaie en brûe, vinnigvloeiende strome en die sluiting van hoofpaaie word voorspel. Daarbenewens is Geel Vlak 2-waarskuwings uitgereik vir plaaslike oorstroming in die oostelike Wes-Kaap en suidelike Oos-Kaap, asook vir gevaarlike wind en golwe langs die kus tussen Kaappunt en Plettenbergbaai wat navigasie vir klein vaartuie kan bemoeilik.
Ligte sneeu word oor die bergtoppe van die sentrale en oostelike dele van die Wes-Kaap, asook oor die hoërliggende gebiede van die suidelike Namakwa-distrik in die Noord-Kaap voorspel.
Limpopo sal bewolkte en mistige oggende beleef met die moontlikheid van ligte motreën. Gauteng kan ‘n koel dag verwag en die Vrystaat en Noordwes sal grootliks helder bly.
Bronne: Suid-Afrikaanse Weerdiens, Vox Weather, IOL Weather
