VRYSTAAT. – ’n Korrektiewedienste-beampte (36) is Donderdagoggend in die G4S- korrektiewe fasiliteit in die Mangaung-metro in hegtenis geneem nadat 149 Mandrax-tablette en saamgeperste dagga glo in sy kosblik gevind is.
Volgens lt.kol Thabo Covane het inligting die owerhede genoop om ’n onverwagte soektog te doen, waartydens die beampte se sluitkas en kosblik deursoek is. Tydens die deursoeking is die Mandrax-tablette, wat met maskeerband toegedraai was, asook saamgeperste dagga in ’n plastieksak, tussen die kos ontdek. Die beampte is daarna deur bestuurders van die G4S-sentrum en lede van Bloemspruit-polisie in hegtenis geneem.
Bloemspruit-polisiekantoor ondersoek ‘n saak van dwelmbesit. Die verdagte sal binnekort in die Bloemfontein-landdroshof verskyn.
