KALIFORNIË. – Owerhede soek steeds na een vermiste persoon in die Castle Peak-gebied van Truckee nadat ’n toergroep van 15 mense deur ’n sneeustorting getref is. Dit is die dodelikste sneeustorting in die VSA in meer as vier dekades.
Volgens The Sun Malaysia is agt skiërs volgens owerhede dood aangetref en een persoon word steeds vermis ná die sneeustorting in die berge van noordelike Kalifornië. Die sneeustorting het die Castle Peak-gebied van Truckee, sowat 16 km noord van Lake Tahoe, omstreeks 11:30 Dinsdag getref.
Owerhede het gister nog na nege vermiste persone gesoek, maar het sedertdien bevestig dat agt mense gesterf het en dat een persoon steeds nie opgespoor is nie.
“Agt van die bykomende nege skiërs is dood aangetref,” het Nevada County se balju, Shannan Moon, gesê. “Ons soek tans nog na een van die groeplede.”
Die groep is vroeg Dinsdag tydens ’n buitelug-ski-uitstappie in ’n afgeleë gebied deur die sneeustorting vasgekeer.
Moon het die voortgesette soektog na die laaste vermiste persoon bevestig en gewaarsku dat die hewige storm reddingspogings ernstig belemmer. “Om te sê dis uiterste weerstoestande is eintlik ’n onderskatting; daar is baie sneeu en stormsterk winde wat dit onmoontlik maak om te sien,” het Moon gesê.
Bronne: The Sun Malaysia, SkyNews
