KWAZULU-NATAL. – ’n 69-jarige dokter is in Madadeni in hegtenis geneem nadat hy daarvan beskuldig is dat hy verskeie van sy pasiënte seksueel aangerand het.
Polisiewoordvoerder, kol. Robert Netshiunda,sê die inhegtenisneming is deur GKS en Madadeni-polisie uitgevoer nadat inligting deur ’n fluitjieblaser ontvang is en verdere ondersoek gevolg het. Volgens die polisie word die dokter daarvan verdink dat hy tussen Augustus 2025 en April 2026 vier vroulike pasiënte by ’n hospitaal in Madadeni onvanpas betas het en in sommige gevalle glo gedwing het om seksuele dade uit te voer. Sake is geopen nadat die slagoffers na vore gekom het.
Die polisie sê indien verdere slagoffers na vore kom, kan addisionele aanklagte bygevoeg word. Die verdagte sal na verwagting Donderdag in die Madadeni-landdroshof verskyn.
