WES-KAAP. – Die karkas van ’n dolfynkalf is Donderdag op Heroldsbaaistrand ontdek, nadat dit uit die see gespoel het.
Die Stranded Marine Animal Rescue Team (S.M.A.R.T.) het bevestig dat hulle vinnig reageer het nadat die voorval aangemeld is. Die span het die karkas veilig verwyder en na hul vriesfasiliteit geneem vir bewaring. Die karkas sal later na dr. Greg Hofmeyr by Bayworld in Gqeberha oorgeplaas word, waar ’n nadoodse ondersoek gedoen sal word om die oorsaak van dood vas te stel. Die bevindings sal ook gebruik word om mariene navorsing en bewaring te ondersteun.
S.M.A.R.T. het hul vrywilligers bedank vir hul vinnige optrede en toewyding aan die beskerming van seelewe. Die organisasie doen ’n beroep op lede van die publiek om enige gestrandde seelewe, hetsy lewend of dood, onmiddellik by hulle aan te meld by 072 227 4715. Vroeë aanmelding speel ’n belangrike rol in redding, rehabilitasie en navorsing.
