PARYS. – Die Franse hoofstad het sy eerste ooit “Modest Fashion Week” aangebied, waar sowat 30 ontwerpers hul versamelings ten toon gestel het. Die geleentheid is by Hôtel Le Marois gehou en het gefokus op ontwerpe met ontspanne silhoeëtte, langer soomlyne en ’n wye verskeidenheid kopdoekstyle.
Dié styl van kleredrag word deur baie Moslemvroue, asook vroue van ander geloofsgroeperings verkies, aangesien dit strook met hul godsdienstige beginsels deur arms, bene en soms hare te bedek. Die vertoning het spesifiek klere beklemtoon wat ontwerp is met beskeidenheid in gedagte, insluitend style geskik vir vroue wat hijabs dra, asook dié wat verkies om volgens geloofs- of persoonlike oortuigings meer bedekkende klere te dra.
Die keuse om die geleentheid juis in Parys aan te bied, dra besondere betekenis. In Frankryk het die dra van hijabs en ander godsdienstige kleredrag gereeld in die verlede opslae gemaak en is dit in sekere omgewings beperk.
Rukaiya Kamba, kreatiewe direkteur van die Nigeriese handelsmerk Flaunt Archive, sê haar besluit om haar versameling in Parys te vertoon, was “baie doelbewus”.
Volgens jong bywoners van die modeweek wat met die BBC gepraat het, het die geleentheid ’n teken geword van ’n meer inklusiewe Franse kultuur wat besig is om te ontwikkel.
Bronne: BBC, The Express Tribune
