OOS-KAAP. – Robin en Kristen Clarke is deur die Gqeberha-hooggeregsof vir die moord op en mishandeling van 19 maande oue peuter, Krisley Faith Dirker, gevonnis. Die saak wat meer as ‘n dekade gelede begin het, het skokgolwe deur die samelewing gestuur. Robin is tot 20 jaar direkte gevangenisstraf gevonnis – 15 jaar vir moord en 5 jaar vir kindermishandeling, wat kumulatief loop. Kristen het ‘n 5 jaar voorwaardelike opgeskorte vonnis vir kinderverwaarlosing en 2 jaar korrektiewe toesig met gemeenskapsdiens ontvang. Die hof het bevind dat die peuter tussen 27 September en 10 Oktober 2013 mishandel is terwyl sy in Kristen se sorg was.
Volgens AO Ndiphiwe Mhlakuvana van die Valke, was Robin Clarke op 10 Oktober 2013 alleen saam met die peuter by die huis, terwyl haar biologiese ma werk toe was. Die peuter is in ‘n kritieke toestand in die Westring Medicross-hospitaal opgeneem nadat sy ernstige kopbeserings en veelvuldige wonde aan haar liggaam opgedoen het. Ondanks pogings om haar lewe te red, het sy kort daarna beswyk. Die Valke het die saak in 2020 verder ondersoek, waartydens die beskuldigdes in hegtenis geneem is.
