GAUTENG. – ‘n Jong egpaar is tydens ‘n huisroof op ‘n plaas by Kraalkop naby Fochville met pepersproei aangeval, voordat rowers met onder meer elektroniese toerusting en kontant gevlug het.
Kol. Dimakatso Nevhuhulwi, polisiewoordvoerder, sê twee verdagtes het na bewering die oggend van 18 Julie toegang tot die woning verkry. Die egpaar is met pepersproei gespuit, waarna die verdagtes met ‘n skootrekenaar, selfoon, WiFi-toestel en ‘n onbekende bedrag kontant op die vlug geslaan het. Volgens inligting het die slagoffers ook ligte beserings opgedoen. Veiligheidstrukture het die verdagtes se spore gevolg tot by ‘n pad waar hulle vermoedelik deur ‘n voertuig opgelaai is.
Niemand is nog in hegtenis geneem nie en die polisieondersoek duur voort.
Bronne: SAPD en Niels Nilsson – Landelike Veiligheid Statistiek Groep SA
