VSA. – Die skielike dood van die Amerikaanse aktrise Hayden Panettiere het nuwe aandag gevestig op die persoonlike stryd waaroor sy slegs enkele maande gelede openlik in haar memoir, This Is Me: A Reckoning, geskryf het. Panettiere is Sondagmiddag in ’n woning in Greenville, Suid-Carolina, bewusteloos met ‘n hartstilstand gevind.
Nooddienspersoneel het gevorderde lewensondersteuning toegepas, maar sy is omstreeks 14:30 dood verklaar. ‘n Lykskouing het volgens die lykskouer geen tekens van trauma getoon nie, terwyl die polisie sê daar is geen aanduiding van gemene spel of verdagte omstandighede nie. Die amptelike oorsaak van dood is nog nie vasgestel nie.
Die inhoud van haar memoir kry nou besondere aandag omdat nooddienskommunikasie met 911 ná haar dood na ’n moontlike oordosis en hartstilstand verwys het. Narcan, ’n middel wat gebruik word om ’n opioïed-oordosis om te keer, is volgens berigte ook op die toneel gevind. Dit beteken egter nie dat ’n oordosis as die amptelike oorsaak van dood bevestig is nie. Die ondersoek is steeds aan die gang en uitslae van verdere toetse word afgewag.
Panettiere het in haar memoir besonder openhartig geskryf oor haar jarelange stryd met alkohol- en opioïedverslawing. Sy het vertel hoe haar probleme ná die geboorte van haar dogter, Kaya, vererger het. Sy het beskryf hoe sy haar na alkohol gewend het om die pyn en angs te probeer hanteer en dit later ’n ernstige verslawing geword het. Panettiere het in die memoir vertel dat ’n dokter haar gewaarsku het dat sy binne vyf jaar kon sterf indien sy nie ophou drink nie.
Sy het uiteindelik in 2020 behandeling vir haar verslawing gekry. Sy het volle toesig oor Kaya aan haar vorige verloofde, die voormalige wêreldkampioen-swaargewigbokser Wladimir Klitschko, afgestaan. Sy het later gesê dit was een van die moeilikste besluite van haar lewe, maar dat sy geglo het dit was in daardie stadium die beste vir haar dogter.
Volgens Panettiere het behandeling haar gehelp om haar emosies en trauma te begin verwerk en weer vreugde in haar lewe te vind. Sy het haar verhaal in die memoir gedeel met die doel om ander mense te help wat met verslawing, depressie en trauma worstel.
Bronne: The Cut, Entertainment Weekly, KMVT, KMVT, Entertainment Weekly, The Guardian , People
