’n Tipiese warm tot baie warm somersdag is vir vandag (Maandag) oor groot dele van die land voorspel, met verskeie provinsies wat gewaarsku word teen erge weerstoestande, met donderstorms en brandgevaartoestande.
Volgens Annette Botha, Vox Weather-meteoroloog, sê die Suid-Afrikaanse weerdiens sommige oostelike streke kan deur donderstorms getref word, wat swaar neerslae, oormatige weerlig, hael en sterk winde kan meebring. Gauteng, die Hoëveld en platorand van Mpumalanga, die suidwestelike dele van Limpopo, asook die oostelike dele van Noordwes en die Vrystaat, is onder ’n Geel Vlak 2-impakwaarskuwing geplaas. Plaaslike oorstromings van paaie, laagliggende gebiede en brûe, sowel as skade aan infrastruktuur en nedersettings, kan voorkom.
Terselfdertyd word uiters hoë brandgevaartoestande oor groot dele van die Noord-Kaap verwag. Soortgelyke brandwaarskuwings geld ook vir dele van die Vrystaat, die Lekwa-Teemane- plaaslike munisipaliteit in Noordwes en die Beaufort-Wes- plaaslike munisipaliteit in die Wes-Kaap.
’n Hittegolf met aanhoudende hoë temperature word tot Woensdag in dele van die Chris Hani-, Joe Gqabi- en noordelike dele van die Alfred Nzo-distriksmunisipaliteite in die Oos-Kaap voorspel. Uiters warm toestande word ook in Beaufort-Wes en Prince Albert in die Wes-Kaap verwag.
Baie ongemaklike en vogtige toestande is oor die oostelike dele van KwaZulu-Natal te wagte.
