MPUMALANGA. – Die Mpumalanga departement van gesondheid het gemeenskappe gewaarsku teen ’n verhoogde risiko van malaria-infeksies ná die onlangse oorstromings in dié provinsie.
Volgens die departement het die oorstromings stilstaande water tot gevolg gehad, wat ’n ideale broeiplek vir malariamuskiete skep. Inwoners word aangeraai om waaksaam te wees vir simptome soos koors en kouekoors, naarheid en braking, hoofpyn, asook spier- en gewrigspyn, wat gewoonlik tussen sewe en 21 dae ná ’n muskietbyt kan voorkom. Enigiemand wat siek voel, word aangeraai om onmiddellik by hul naaste gesondheidsfasiliteit vir malaria getoets te word.
Die departement het ook voorkomingsmaatreëls beklemtoon. Dit sluit in die dra van langmouklere en skoene in die aand, die opruim van stilstaande water rondom huise, asook die gebruik van insekdoders, muskietsmeermiddels en ander voorkomende items, veral in slaapkamers.
