WES-KAAP. – ‘n Huiseienaar het glo Woensdagoggend verdagtes van ‘n inbraak in sy huis in Tigerstraat, Kraaifontien betrap. Die huiseienaar het na bewering verskeie skote tydens ‘n konfrontasie vir selfbeskerming geskiet en ‘n verdagte noodlottig getref.
Titanium Securitas sê in ‘n sosialemediaplasing dié diens het omstreeks 11:15 op ’n waarskuwing van die Zoo Park-buurtwag gereageer ná skote in die gebied gehoor is. Met aankoms is bevestig dat twee verdagtes glo ’n woning betree het.
Volgens inligting het die huiseienaar by die oprit ingetrek en die verdagtes in die huis betrap. Toe hy hulle konfronteer, het die verdagtes glo met ’n mes en ’n gholfstok op hom afgestorm, waarna hy skote geskiet het. Die verdagte wat noodlottig getref is, is naby die toneel aangetref.
Die tweede verdagte het gevlug en word steeds gesoek.
Volgens dié diens het Kraaifontein-polisiebeamptes die toneel besoek en ’n ondersoek is aan die gang.
