OOS-KAAP. – Gqeberha-speurders soek inligting nadat drie mans en ‘n vrou op 7 November omstreeks 21:00 in Airport Valley, Walmer, doodgeskiet is.
Kapt. André Beetge, polisiewoordvoerder, het Dinsdag in ‘n verklaring gesê die provinsiale eenheid vir georganiseerde misdaadondersoek (OCI) het ’n soektog van stapel gestuur na verdagtes wat verantwoordelik is vir die moord op vier persone. Die Walmer-polisie is na die toneel van ‘n skietvoorval ontbied. Met hulle aankoms het die beamptes die liggame van vier onbekende volwassenes, tussen 25 en 30 jaar oud, met skietwonde aangetref. ‘n Saak van vier moorde is geopen.
Beetge het bevestig dat die ondersoek voortduur en dat die polisie enige inligting wat tot die inhegtenisneming van die verdagtes of die identifikasie van die slagoffers kan lei, sal verwelkom. Lt.kol. Sithole kan by 082 457 2812 gebel word.
