ISRAEL. – Die Israeliese politieke veiligheidskabinet het vroeg vanoggend die eerste minister, Benjamin Netanyahu, se plan om volledig beheer te neem van Gasastad goedgekeur.
Lees ook: Benjamin Netanyahu wil glo ‘Gasa ten volle beset’
Die meerderheid lede van die veiligheidskabinet het ten gunste van Netanyahu se plan gestem.
Netanyahu se kantoor het in ’n verklaring gesê die doel is vir ’n totale oorwinning teen Hamas en om humanitêre hulp aan burgerlikes “buite oorlogsones” te voorsien.
Die kabinet het vyf beginsels goedgekeur om die oorlog te beëindig. Die beginsels sluit in: die ontwapening van Hamas, die terugkry van die 50 gyselaars in Gasa (slegs 20 lewe nog), die “demilitarisering” van Gasa, die verkryging van veiligheidsbeheer deur Israel oor Gasa en die vasstel van ’n alternatiewe burgerlike administrasie.
Netanyahu het gister gesê Israel is van plan om beheer oor die hele Gasa oor te neem téén die advies van die Israeliese weermag en waarskuwings dat die gyselaars in gevaar gestel gaan word en nog Palestynse burgerlikes gedood kan word.
Bronne: New York Times, Sky News, Euronews
