VSA. – Johnson & Johnson (J&J) het ‘n voorgestelde skikking van $5,5 miljard aangekondig om die oorblywende sowat 76 000 regsgedinge af te handel. Daarin word beweer dat die maatskappy se talkprodukte eierstokkanker veroorsaak het.
Die maatskappy het hom verbind tot ‘n skikking van $5,5 miljard, mits minstens 95% van die oorblywende eisers die ooreenkoms aanvaar. Die eerste betaling van hoogstens $3 miljard sal na verwagting in 2027 gemaak word, met verdere betalings wat eers daarna sal volg. Volgens Johnson & Johnson volg die voorgestelde skikking op ‘n onlangse hofuitspraak waarin bevind is dat die eisers nie voldoende wetenskaplike bewyse kon lewer om aan te toon dat die maatskappy se talkprodukte ‘n spesifieke persoon se eierstokkanker veroorsaak het nie. Die maatskappy hou vol dat sy kosmetiese talkprodukte veilig is, nie asbes bevat nie en nie kanker veroorsaak nie. Johnson & Johnson sê die voorgestelde skikking is daarop gemik om ‘n einde te maak aan die bykans 15 jaar lange regstryd en die koste van verdere litigasie te verminder.
Johnson & Johnson het reeds in 2023 die wêreldwye verkoop van sy talkgebaseerde JOHNSON’S® Baby Powder gestaak en dit met ‘n mieliestysel-gebaseerde produk vervang.
Druk hier om meer te lees.
Bronne: Johnson & Johnson Newsroom, Johnson & Johnson Investor Relations
