GAUTENG. – ’n Besending van 95 kilogram kokaïen vanaf Brasilië, met ’n geskatte waarde van R28 miljoen, is op die OR Tambo Internasionale Lughawe onderskep.
Brig. Athlenda Mathe, nasionale polisiewoordvoerder, sê die intelligensiegedrewe operasie is Vrydag uitgevoer nadat inligting oor die besending kokaïen ontvang is. Polisiebeamptes van sigbare polisiëring (Vispol) by die lughawe het die inligting saam met doeanebeamptes en operasionele personeel van Menzies Aviation ondersoek.
Die vrag het omstreeks 13:00 op ’n vlug vanaf São Paulo, Brasilië, in Suid-Afrika aangekom en is kort daarna in die vragafdeling van die lughawe onderskep. Daar is op die 95 kilogram kokaïen beslag gelê.
Nog niemand is tot dusver in hegtenis geneem nie. Ondersoeke duur voort om die persone wat na bewering by die smokkeloperasie betrokke is, te identifiseer en in hegtenis te neem.
