KWAZULU-NATAL. – Owerhede in KwaZulu-Natal monitor padtoestande en laagliggende gebiede noukeurig. Sneeu het in die Drakensberg begin uitsak en ligte reën en motreën is in verskeie dele van die provinsie aangemeld.
Siboniso Duma, die LUR vir vervoer en menslike nedersettings, sê spanne van die departemente van vervoer en menslike nedersettings is sedert Dinsdagaand ontplooi om die situasie dop te hou. Volgens die Padverkeersinspektoraat (RTI) het sneeu teen 10:00 in die Drakensberggebied, insluitend Sani-pas en Mount Fletcher, voorgekom. Reën is ook in Kokstad aangemeld, terwyl dit in Underberg reën en mistig is. Operateurs van skrapers is gereed om sneeu te verwyder voordat dit meer as 30 cm ophoop.
Die N3 by Van Reenen, tussen Harrismith en Ladismith, word voortdurend gemonitor. Padsluitings sal ingestel word indien dit nodig is om te voorkom dat motoriste op die roete vasval. Duma sê die menslike nedersettingspan monitor intussen kus- en laagliggende gebiede waar informele nedersettings aan oorstromings blootgestel kan word. Motreën is reeds in dele van Durban en ander kusmunisipaliteite aangemeld.
Meer as 170 kamers is by die nuutverworwe Montclair Lodge beskikbaar gestel om gesinne te huisves wat moontlik deur oorstromings ontheem kan word.
Werk aan die herstel van die Quarry Heights-brug, wat tydens die 2022-vloede beskadig is, duur voort. Ingenieurs van die departement van vervoer het ook dreinering by verskeie brûe verbeter om waterophoping en oorstromings op paaie te beperk.
