OOS-KAAP. – Al 21 vissers is Maandag omstreeks 17:50 veilig gered nadat ’n brand op die Silver Dorado-boot, sowat een seemyl van Noordhoek, Gqeberha, uitgebreek het.
Luidens ‘n verklaring van Craig Lambinon, NSRI-woordvoerder, is Gqeberha-stasie 6 geaktiveer nadat ’n ooggetuie die voorval deur die 112-noodnommer aangemeld het. ’n Mayday-noodoproep van die boot is ook op mariene VHF-kanaal 16 onderskep. Die bemanning het aangedui dat ’n brand aan boord uitgebreek het en dat alle lede voorberei om die vaartuig te verlaat.
Verskeie plaaslike vissersvaartuie het gehelp om die vissermanne uit die see en op ’n reddingsvlot te help. Mark Dawson, NSRI-Gqeberha-stasiebevelvoerder het gesê almal is gered en was veilig. Die NSRI het die vissermanne daarna na die hawe van Port Elizabeth geneem waar nooddienspersoneel hulle ondersoek het. Geen beserings is aangemeld nie.
Die steeds brandende boot, wat gemonitor word, het intussen in die rigting van Kaap Recife gedryf. Die eienaars het ‘n maatskappy aangestel om die boot uit die water te herwin en ‘n besoedelingsreaksiemaatskappy om toegang tot die boot te verkry, wat deur die gevaarlike rif en die donkerte bemoeilik is.
Die Suid-Afrikaanse Maritieme Veiligheidsowerheid (Samsa) en die polisie ondersoek die oorsaak van die brand.
