MPUMALANGA. – ’n Ondersoek is ingestel nadat ’n video op sosiale media versprei is waarin ’n polisiekonstabel na bewering ’n lid van die publiek aanrand. Die voorval het glo op 2 April by die Volksrust-polisiekantoor plaasgevind.
Brig. Donald Mdhluli, polisiewoordvoerder, sê die bewerings word ernstig opgeneem en dat ’n interne sowel as ’n strafregtelike ondersoek reeds aan die gang is. Die onafhanklike polisie-ondersoekdirektoraat (Opod) is ook in kennis gestel en sal na verwagting sy eie ondersoek loods.
Die polisie het intussen beklemtoon dat hulle verbind bly tot professionele optrede en aanspreeklikheid, en dat enige oortredings streng hanteer sal word.
Genl.maj. Zeph Mkhwanazi, die waarnemende provinsiale polisiekommissaris, sê die gedrag van lede is van kardinale belang om openbare vertroue te behou, en dat daar beslissend opgetree sal word teen enige vorm van wangedrag.
