WES-KAAP. – Polisie is op die spoor van verdagtes nadat besoekers na bewering gedurende die langnaweek deur vroue in ’n woonstel in Bantrybaai bedwelm en beroof is.
Kapt. F.C. van Wyk sê aan Nuusflits die Seepunt-polisie ondersoek ’n saak van huisbraak en diefstal ná ’n voorval by ’n eiendom in Kusweg, Bantrybaai. Die voorval het Vrydag 24 April tussen 16:30 en 17:00 plaasgevind. Verskeie persoonlike besittings en klere is uit die woning gesteel. Die polisie sê ondersoeke duur voort en nog geen inhegtenisnemings is gemaak nie.
Yusuf Abramjee sê volgens berigte het die slagoffers die vroue by Ayepyep-restaurant ontmoet voordat hulle glo “iets” toegedien is. Klere, kontant en selfone ter waarde van ongeveer R300 000 is tydens die voorval gesteel. ’n Beloning van R10 000 word aangebied vir enige inligting wat kan help om die verdagtes vas te trek. Bel 071 591 6120.
