Peet Viljoen het Vrydag by die hof aangekom waar hy na verwagting in die hof verskyn op 400 aanklagte, insluitend bedrog, korrupsie, vervalsing en diefstal.
Joshua van Blommestein, Nuusflits-verslaggewer, is in die hof.
Mel Viljoen het vroeër ook by die hof opgedaag.
Haar aankoms volg kort nadat sy en Peet sowat ’n uur tevore ’n openbare verskoning op sosiale media gedeel het.
In die plasing, wat deur Mel geplaas is, skryf die egpaar: “To everyone we have hurt, this is one of the most difficult posts we have ever written.”
Mel en Peet sê in die verklaring dat hulle verantwoordelikheid vir hul verlede wil neem en vra om verskoning aan mense wat hulle deur hul video’s, woorde en optrede seergemaak het.
Volgens die plasing erken hulle dat hulle soms sonder genoeg genade gepraat het, sonder genoeg deernis gereageer het en dinge gesê het wat mense seergemaak het.
“Ons kan nie uitvee wat reeds gesê of gedoen is nie. Ons kan nie die geskiedenis herskryf nie. Maar ons kan dit eerlik erken en om vergifnis vra,” lui die verklaring.
Die egpaar sê verder dat hulle verstaan vergifnis kan nie geëis word nie en dat toekomstige optrede sal moet wys dat die verandering werklik is.
Viljoen, ’n geskrapte prokureur en werklikheids-TV-persoonlikheid, word saam met Resimate Maringa, Dorah Madisha, Wiets Nell, Ronel van Vuuren en Edmund Sibisi aangekla.
Die aanklagte hou verband met bewerings dat munisipale eiendom in 2010 onwettig verkoop is.
Volgens die staat het die groep na bewering waardevolle munisipale eiendomme geteiken en ’n papierroete gefabriseer om die onwettige oordrag van die eiendomme na private maatskappye te fasiliteer.
Die staat beweer dat geen geld aan die Stad Johannesburg of die Johannesburg Property Company betaal is nie. In plaas daarvan is byna R15 miljoen na bewering onder lede van die sindikaat versprei.
Die hofverskyning volg nadat eNCA berig het dat Amerikaanse owerhede lasbriewe vir Peet en Mel Viljoen uitgereik het nadat hulle glo versuim het om in ’n hof in die VSA te verskyn.
Volgens eNCA kan die egpaar in hegtenis geneem word indien hulle weer die Verenigde State probeer binnekom.
Die saak duur voort.
