MPUMALANGA. – Beeldmateriaal van ‘n persoon wat riviere onwettig oorsteek, op geslote paaie ry en roekeloos binne die Kruger Nasionale Park (KNP) bestuur, het groot kommer by SANParke gewek. Pogings tans aan die gang is om die individu op te spoor.
JP Louw, SANParke se hoof van kommunikasie en woordvoerder, sê die gedrag toon growwe minagting vir bewaringsregulasies en openbare veiligheid. Dit sal nie geduld word nie en sal met die nodige erns hanteer word. “Roekelose bestuur in beskermde gebiede bedreig nie net mense se lewens nie, maar ook die wildlewe, sensitiewe ekostelsels en die veiligheid van ander parkbesoekers.”
Louw sê voorts wanneer die persoon in die voertuig geïdentifiseer is, sal hy die volle gevolge van die wet in die gesig staar, insluitend boetes en die intrekking van toegangsvoorregte tot alle SANParke-gebiede. Hek-amptenare wat in die video die gedrag aanmoedig, sal eweneens verantwoordelik gehou word. Lede van die publiek met inligting word versoek om SANParke deur die amptelike kanale of die naaste wetstoepassingsowerheid te kontak.
Dié beeldmateriaal kan op die @JVR_ONLINE Instagram blad gesien word.
