Video-opname in berig.
VSA. – ‘n Toeris is Vrydag ernstig beseer nadat ‘n woedende bison hom sowat 2,5 meter die lug ingeskiet het, tydens ‘n aanval in die Bridge Bay-kampeerterrein in Yellowstone Nasionale Park in die Amerikaanse deelstaat Wyoming.
Die voorval het Vrydag plaasgevind en is deur die professionele fotograaf Mike MacLeod op video vasgevang. Dié fotograaf het die dier se aggressiewe gedrag reeds ‘n geruime tyd dopgehou.
Volgens MacLeod het die bison deur die kampeerterrein beweeg en kort tevore ook in die rigting van ‘n groep kinders gehardloop, voordat dit die man, wat saam met sy kleinseun gestap het, aangeval het.
Video-opnames wys hoe die bison die man met sy horing oplig en hoog die lug in skiet, voordat hy hard op die grond beland. Omstanders het ingegryp om die dier af te skrik en verdere beserings te voorkom. Die man het daarna mediese behandeling ontvang. Volgens ooggetuies het die toeris en sy kleinseun nie die dier gepla of te naby aan hom beweeg nie. MacLeod sê die aanval was ongewoon en die bison het reeds tekens van aggressie getoon voordat die voorval plaasgevind het.
Bisons is die grootste landsoogdiere in Noord-Amerika en kan tot drie keer vinniger as mense hardloop. Yellowstone-owerhede beveel aan dat besoekers minstens 23 meter van bisons af bly, aangesien hulle onvoorspelbaar kan wees, veral gedurende die paarseisoen.
Op 26 Junie is ‘n 12-jarige ook beseer, lees meer hier onder:
Bronne: National Park Service (Yellowstone), ABC News, People, Cowboy State Daily, KTVQ News
